Dagur gegn einelti er nú haldinn í tíunda sinn en hann var haldinn hátíðlegur í fyrsta skipti hér á landi 8. nóvember árið 2011 og hefur síðan verið haldinn fyrsta virka dag kringum þá dagsetningu, sem er 9. nóvember þetta árið. Markmiðið er m.a. að efna til umræðu, fræðslu og viðburða til að vinna gegn einelti, hvetja til jákvæðra samskipta og efla vináttu. Streymt var frá afhendingu hvatningarverðlauna á degi gegn einelti í morgun og hlaut Laufey Eyjólfsdóttir, kennari og umsjónarmaður með Olweusarverkefninu í Melaskóla, verðlaunin þetta árið. Einnig var frumsýnt nýtt myndband sem Heimili og skóli settu saman í tilefni dagsins og er yfirskrift þess: Dagur gegn einelti – skilaboð til þín.

Hvatningarverðlaun á degi gegn einelti
Á síðasta ári fóru Heimili og skóli – landssamtök foreldra í formlegt samstarf við Menntamálastofnun og mennta- og menningarmálaráðuneyti með umsjón með deginum og í ár var í fyrsta skipti hægt að tilnefna einstaklinga eða verkefni til hvatningarverðlauna á degi gegn einelti og gat almenningur sent inn tilkynningar á vefsíðu Heimilis og skóla. Fagráð eineltismála í grunn- og framhaldsskólum fór yfir tilnefningarnar og valdi verðlaunahafa sem kynntur var við hátíðlega athöfn í Þjóðleikhúsinu. Lilja D. Alfreðsdóttir, mennta- og menningarmálaráðherra, afhenti verðlaunin ásamt Sigrúnu Eddu Eðvarðsdóttur, formanni Heimilis og skóla. Vegna sóttvarna og samkomutakmarkana var athöfnin fámenn en góðmenn en henni var streymt á facebook-síðu Heimilis og skóla.
Laufey Eyjólfsdóttir hlýtur í ár hvatningarverðlaun á degi gegn einelti en fjöldamargar tilnefningar bárust og þar af 21 með nafni Laufeyjar og rökstuðningi fyrir því af hverju hún ætti að hljóta þennan heiður. Laufey hefur haft umsjón með Olweusarverkefninu í Melaskóla frá árinu 2004 eða í rúm 16 ár og hefur verið óþreytandi við að stuðla að vellíðan barna í skólanum. Í rökstuðningi segir m.a. að Laufey hafi unnið að því að styðja og leiðbeina starfsfólki skólans við að efla góðan skólabrag og koma óæskilegri hegðun og samskiptum í réttan farveg. Eineltiskannanir síðustu ára benda til þess að árangur af starfi skólans í málaflokknum sé aðskila sér í bættum samskiptum og færri eineltismálum.
Hér á eftir fer tilvitnun úr einni af tilnefningunum sem er lýsandi fyrir starf Laufeyjar í gegnum árin: „Hún heldur kennurum og öðru starfsfólki skólans við efnið með því að vera sífellt að deila hugmyndum að verkefnum fyrir bekkjarfundi eða samræður, gefa kennurum tækifæri til að ígrunda um mikilvæg málefni. Hún fræðir nýtt starfsfólk sem kemur til starfa, styður okkur kennarana þegar upp koma mál sem ganga þarf í. Hún er einfaldlega alltaf til staðar og ég ásamt öllum sem til þekkja vitum að þessi elja hennar og staðfesta hefur skipt sköpum í því að bæta líðan nemenda við skólann. Gera skólann að griðarstað þar sem allir eiga að fá að vera öruggir, á sínum forsendum og ánægðir með sjálfa sig eins og þeir eru.”
Úr umsöng fagráðs gegn einelti segir: „Laufey sýnist okkur vera einstaklingur með hjartað á réttum stað, með næmt auga fyrir því sem betur má fara í samskiptum og ómetanlegur drifkraftur í svo stórum skóla sem Melaskóli er. Það er ómetanlegt fyrir skólasamfélag Melaskóla að njóta góðs af hennar störfum, enda þarf ekki að velkjast í vafa um að þarna er eldhugi að verki sem brennur fyrir velferð barna.“

Nýtt myndband frumsýnt
Heimili og skóli frumsýndu við þetta tilefni nýtt myndband sem samtökin létu gera fyrir dag gegn einelti. Þar koma fram fyrirmyndir í samfélaginu svo sem forseti Íslands, leikarar, rithöfundar, þáttastjórnendur, íþróttamaður, sérfræðingur, ráðherra o.fl. með skilaboð gegn einelti. Yfirskrift myndbandsins er: Dagur gegn einelti – skilaboð til þín og þar eru persónuleg skilaboð frá fyrrnefndum fyrirmyndum sem ætluð eru áhorfandanum. Ástæðan fyrir að talað er svo persónulega er sú að við viljum vekja fólk til meðvitundar um að við höfum öll hlutverk í eineltismálum. Ef við verðum vitni að einelti eða öðru ofbeldi erum við strax orðin hluti af því samhengi sem atvikið á sér stað í og höfum þá val um hvað við gerum eða hvort við gerum eitthvað eins og að mótmæla, sýna stuðning, láta einhvern vita eða hvort við gerum ekki neitt. Við höfum öll ábyrgð og getum stöðvað einelti með því að taka afstöðu. Einelti á sér ekki stað í tómarúmi og ef engir væru áhorfendurnir væri líklega ekki einelti til staðar. Einelti hefur áhrif á alla sem verða vitni að því þótt það hafi vissulega enn verri áhrif á þá sem fyrir því verða auk þess sem gerendur lenda oft í vandræðum síðar á lífsleiðinni. Myndbandinu er ætlað að vekja almenning til umhugsunar um eðli og alvarleika eineltis og að við höfum öll eitthvað að segja um hvort það viðgengst eða ekki. Hægt er að sýna það við ýmis tækifæri og nýta m.a. annars við kennslu og umræður.