Læsissáttmáli Heimilis og skóla er nú tilbúinn og var kynntur 1. september 2016 við hátíðlega athöfn í Vallarskóla á Selfossi þar sem mennta- og menningarmálaráðherra og formaður Heimilis og skóla sögðu frá verkefninu.

illugi

Haustið 2015 undirrituðu fulltrúar Heimilis og skóla – landssamtaka foreldra, mennta- og menningarálaráðherra og fulltrúar allra sveitarfélaga landsins þjóðarsáttmála um læsi með það að markmiði að öll börn geti við lok grunnskóla lesið sér til gagns. Eitt af meginverkefnum Heimilis og skóla í því samhengi var að útbúa Læsissáttmála fyrir foreldra og innleiða hann í skóla landsins. Er það liður í því að ná markmiðum Hvítbókar um umbætur í menntun þar sem ætlunin er að 90% (úr 79%) grunnskólanema nái lágmarksviðmiðum í lestri og 60% nemenda ljúki námi úr framhaldsskóla á tilsettum tíma (úr 44%)

14163940_10153832503972876_1491888064_o

Sáttmálinn var kynntur við hátíðlega athöfn í Vallaskóla á Selfossi en sveitarfélagið Árborg hefur náð miklum árangri í að efla foreldrastarf og móta læsisstefnu fyrir skóla sveitarfélagsins. Því var við hæfi að hleypa verkefninu af stað þar. Nemendur úr Tónlistarskóla Árnesinga sáu um tónlistarflutning og sigurvegari Stóru upplestrarkeppninnar í Árborg, Hveragerði og Ölfus flutti ljóð. Illugi Gunnarsson, mennta- og menningarmálaráðherra, flutti ávarp þar sem hann þakkaði hið góða og öfluga samstarf sem ráðuneytið hefur átt við Heimili og skóla og taldi verkefnið lofa góðu. Ánægjulegt væri að sjá þann ávöxt sem átak í læsismálum væri að bera. Formaður Heimilis og skóla, Anna Margrét Sigurðardóttir, tók því næst til máls og lýsti tilurð verkefnisins og tilgangi en því er ætlað að efla foreldra í að styðja við læsi og lestrarþjálfun barna sinna. Á næstu vikum og mánuðum mun starfsfólk Heimilis og skóla ferðast um landið og kynna sáttmálann og dreifa honum en haldnir verða hátt í 50 kynningarfundir fyrir foreldra um land allt. Þorsteinn Hjartarson, fræðslustjóri sveitarfélagsins Árborgar, sagði því næst frá þeirri vinnu sem Árborg hefur innt af hendi í þeim tilgangi að efla læsi barna og að þar væri samvinna við heimilin mikilvæg. Sveitarfélagið hefur sett sér læsisstefnu, líkt og kveðið er á um í þjóðarsáttmála, og talaði Þorsteinn um að betra læsi barna og ungmenna væri svo sannarlega samvinnuverkefni allra.

Photo 01-09-16 15 26 54

Við undirbúning Læsissáttmálans var settur saman fjölbreyttur rýnihópur fagfólks sem vann að gerð sáttmálans ásamt starfsfólki Heimilis og skóla. Einnig var sáttmálinn sendur víðar til yfirlestrar. Honum fylgir fjölbreytt efni fyrir börn og fullorðna. Það er von okkar að Læsissáttmálinn nýtist sem flestum og verði notaður í skólum landsins um ókomin ár. Fyrstu viðtökur lofa góðu og hlakka stjórn og starfsfólk Heimilis og skóla til að innleiða hann um land allt á næstu mánuðum. Allir eru velkomnir á opna kynningarfundi sem auglýstir verða á heimasíðu samtakanna, heimiliogskoli.is, á facebook og víðar.