Fréttir

19.01.2010 | Fréttir

Lífsstíl 7 til 9 ára barna breytt

Mögulegt er að breyta lífsstíl og lifnaðarháttum barna á jákvæðan hátt með réttum íhlutunaraðgerðum í almennu skólastarfi.

Þetta er niðurstaða rannsóknar sem nefnist Lífstíll 7-9 ára barna, en um er að ræða samstarfsverkefni sem vísindamenn og framhaldsnemar við Menntavísindasvið og Heilbrigðisvísindasvið Háskóla Íslands unnu að á árunum 2006-2008.

Rannsóknin sýndi að grunnskólabörnin sem tóku þátt í þessu tveggja ára íhlutunarverkefni hreyfðu sig meira, voru í betra líkamlegu formi og borðuðu hollari mat að tveimur árum liðnum samanborið við börn í viðmiðunarhóp.

Verkefnið miðaði að því að auka heilbrigði barna og var unnið í samstarfi við Menntasvið Reykjavíkurborgar og sex grunnskóla í borginni. Niðurstöður rannsóknarinnar verða kynntar í þættinum Hreyfing og hollusta – lykill að framtíð  sem sýndur verður í Sjónvarpinu þriðjudaginn 19. janúar kl. 21.30.

Forsaga málsins er sú að haustið 2006 var 300 sjö ára börnum í sex grunnskólum Reykjavíkur boðin þátttaka í ýmsum mælingum, m.a. á holdafari, þreki, hreyfingu, beinþéttni, mataræði og þáttum sem tengdust lífsstíl þeirra. Þátttökuskólunum var skipt af handahófi í tvo hópa; þrír íhlutunarskólar og þrír viðmiðunarskólar. Engin afskipti voru höfð af viðmiðunarskólunum yfir rannsóknatímabilið. Að tveggja ára íhlutunartímabili loknu árið 2008 voru allir þátttakendur mældir á sama hátt og við upphaf rannsóknarinnar.

Íhlutunaraðgerðir voru framkvæmdar bæði í skólunum og í samstarfi við foreldra. Rannsakendur unnu í náinni samvinnu við kennara og stjórnendur í hverjum íhlutunarskóla þannig að sem best samþætting markmiða og skólastarfs næðist.

Við upphaf rannsóknarinnar hreyfðu börn í íhlutunarskólunum sig að jafnaði um 35 mínútur á dag í skipulagðri hreyfingu. Afar fá börn hreyfðu sig samkvæmt hreyfiráðleggingum Lýðheilsustöðvar, sem er 60 mínútur á dag í miðlungserfiðri eða erfiðri hreyfingu. Við mat á íhlutunum kom í ljós að samkvæmt skráningu hafði skipulögð hreyfing á skólatíma aukist jafnt og þétt yfir rannsóknartímabilið.

Undir lok íhlutunartímabilsins fengu börn í íhlutunarskólunum að jafnaði um 60 mínútur af skipulagðri hreyfingu á skólatíma. Niðurstöður hreyfimælinga sýndu einnig umtalsverða aukningu hreyfingar af miðlungserfiðri og erfiðri hreyfingu á skólatíma, einkum meðal drengja. Þátttakendur í íhlutunarhópi juku þrek sitt hlutfallslega meira en þátttakendur viðmiðunarskólanna, eða að meðaltali um 10% frá því þeir voru mældir haustið 2006.

Við upphaf rannsóknarinnar var ávaxta- og grænmetisneysla barnanna lág, því var mest áhersla lögð á að auka hana. Í íhlutunarskólum jókst ávaxta- og grænmetisneysla á tímabilinu í um meira en 60 gr ádag að meðaltali, en minnkaði á sama tíma í viðmiðunarskólunum um 45 gr á dag. Við lok tímabilsins náðu 22% barnanna í íhlutunarskólunum ráðleggingum varðandi ávaxtaneyslu og 4% ráðleggingum varðandi grænmetisneyslu, samanborið við 16% og 0% í viðmiðunarskólunum.

Fiskneysla jókst í báðum hópum. Gæði fitu í fæðu barna í íhlutunarskólunum jukust. Sykurneysla var enn há við lok rannsóknarinnar en trefjaneysla hafði aukist í íhlutunarskólunum. Báðir hópar náðu að meðaltali ráðlögðum dagskammti af joði við lok rannsóknarinnar en ekki af D vítamíni.

mbl.is

Sjá einnig viðtal í Kastljósi, mánudaginn 18, janúar 2010, hér.

Til baka